"Bunyodkor"ning tajribali o‘yinchisi Lutfulla To‘rayev ham barcha futbolchilarimiz singari bugun uy sharoitida mashg‘ulot o‘tkazmoqda. Karantinga qat’iy amal qilayotgan yarim himoyachimiz o‘z fikrlari bilan o‘rtoqlashdi.

"Karantinga oilam bilan qat’iy amal qilgan holda uydan tashqariga chiqmayapmiz. Kitob o‘qib, farzandlarim bilan shug‘ullanyapman. Qolaversa, formamni ushlab turish maqsadida uy tartibida mashg‘ulot o‘tkazyapman.

Karantin qachon tugashi noma’lum. Mavsum qachon davom ettirilishi ham noaniq. Shu bois karantindan keyin jismoniy holatni tiklab olish oson bo‘ladi, deb o‘ylamayman. Sababi, hamma uyida yakka tartibda shug‘ullanyapti, jamoaviy mashg‘ulotlar o‘tkazilmayapti. Baribir yakka tartibda shug‘ullangan bilan jamoaviy mashg‘ulotlarning orasida katta farq bor.

Mavsum qancha kech davom ettirilsa taqvim ham shuncha zichlashadi. Buni bir yaxshi tarafi bor. Hamma futbolchi o‘yin amaliyotiga ega bo‘ladi. Barcha o‘yinchilarning jismoniy holati bir xil bo‘lish ehtimoli yuqori. Bunday vaziyatda murabbiylarda  ham rotasiya qilish, istagan futbolchisini xohlagan vaqtda maydonga tushirish imkoniyati bo‘ladi. Chunki aytganimdek, taqvim tig‘iz bo‘lgani uchun hammaga maydonga tushish imkoniyati beriladi va bu o‘z-o‘zidan jismoniy holatning bir xil bo‘lishiga zamin yaratadi.

Xalqimizga nima deyishim mumkin? Hukumatimiz tomonidan belgilangan karantin qoidalariga, gigiyena qat’iy amal qilaylik. Uyda qolib, virusni tarqalishining oldini olishga hissa qo‘shaylik. Xudo xohlasa virus tez orada ortga chekinadi va biz yana avvalgidek hayot tarziga qaytamiz, degan umiddaman", — dedi To‘rayev klub matbuot xizmatiga bergan intervyusida.