«Manchester Yunayted» yarim himoyachisi Nemanya Matich Krishtianu Ronaldu yoki Lionel Messidan qaysi biri kuchli ekani haqidagi savolga javob bera olmasligini aytdi.

«Agar o‘g‘limdan so‘rasangiz, u Ronaldu — zo‘r, deydi. Messi bilan taqqoslaganda, ular turli toifadagi futbolchilar. Albatta, Krishtiauning iqtidori bor. Lekin u muvaffaqiyatlarining aksariyatiga tinimsiz mehnat evaziga erishgan. Messida ham talant bor. Men uni mehnat qilmaydi, deb aytmayman. Tabiiyki, u ham ishlaydi. Lekin ular — har xil o‘yinchilar.

Ulardan qaysi bir kuchli ekanini ayta olmayman. Ular — so‘nggi 15 yil ichida jahonning eng kuchli ikki futbolchilari. Kimdir Messini, boshqasi Ronalduni tanlaydi.

Fikrimcha, ular 15 yildan beri bir xil saviyada o‘ynab kelishmoqda. Ular amalga oshirayotgan ish — hayratlanarli. Uzoq yillar davomida bunday darajani ushlab turish juda qiyin. Nazarimda, ular futbol tarixidagi eng yaxshi o‘yinchilar», – dedi Matich.

Ma’lumot o‘rnida.
— Messi oltita, Ronaldu beshta «Oltin to‘p»ni qo‘lga kiritgan.
— Argentinalik futbolchi klub darajasida 34ta, portugaliyalik o‘yinchi 28ta sovringa ega chiqqan.
— Ronaldu terma jamoa bilan Yevro-2016 va Millitlar ligasi-2019da g‘olib chiqqan bo‘lsa, Messi hisobida Olimpiada-2008 chempionligi mavjud.