Angliya futbol ligasi (AFL) va Professional futbol assosiasiyasi (PFA) birgalikda tashabbus ko‘rsatdilar.

Angliyada futbolchilar maoshini kamaytirish bo‘yicha rasmiy tavsiyalar qabul qilindi. "Sky Sports" xabariga ko‘ra, milliy chempionatning birinchi va ikkinchi ligalari klublari aprel oyi uchun futbolchilar maoshini kamaytirish bilan bog‘liq vaziyatni hal qilishda yordam so‘rashgan. Eslatib o‘tamiz, hozirgi paytda Angliyada, boshqa Yevropa mamlakatlarida bo‘lgani kabi, futbol musobaqalari koronavirus pandemiyasi tufayli to‘xtatilgan edi.

AFL va PFAning qaroriga ko‘ra, oyiga 2500 funtdan kam maosh oladigan futbolchilarning maoshi to‘liq beriladi. Ammo oyiga 2500 funtdan ko‘proq oladigan futbolchilarning maoshi 25 foizga kamaytirilishi kerak.

Ikkala tashkilot ham bu qaror faqat tavsiya xarakteriga ega ekanligini ta’kidladilar.