«Real»ning germaniyalik sobiq futbolchisi Toni Kroos Madrid klubiga yangi rolda qaytishi mumkin.

Avvalroq, 2024 yilda futbolchilik faoliyatini yakunlagan Kroosni «qaymoqranglilar» taklif qilishdan manfaatdor ekanligi haqida ma’lumotlar paydo bo‘lgan edi.

Onda Cero xabariga ko‘ra, «Real» Kroosning jamoa va rahbariyat o‘rtasidagi bog‘lovchi bo‘g‘inga aylanishini istamoqda. Ehtimol, u Yevropada mashhur bo‘lgan, ammo boshqa mintaqalarda (jumladan, MDH davlatlarida) deyarli qo‘llanilmaydigan texnik koordinator lavozimini egallaydi.

Toni Kroos futbolchi sifatida 2014 yildan 2024 yilgacha «Real» sharafini himoya qilgan. Ushbu davr mobaynida u 465 ta o‘yinda maydonga tushib, 28 ta gol urgan va 99 ta golli uzatmaga mualliflik qilgan.