FIFA sobiq prezidenti Yozef Blatter korrupsiya bilan bog‘liq mojarolar tufayli 2022 yilgi jahon chempionatini Qatarda o‘tkazishdan voz kechishni taklif qildi.
Avvalroq AQSH adliya vazirligi bir necha yillik surishtiruv ishlaridan keyin Rossiya va Qatarni pora evaziga Mundial mezbonligini qo‘lga kiritganlikda ayblab chiqqan edi.
«Korrupsiya bilan bog‘liq mojarolar tufayli 2022 yilgi jahon chempionatini Germaniya o‘zida qabul qilishi mumkin. Ammo JCH-2018 Rossiyada o‘tganini inobatga olsak, turnir ketma-ket 2 marta Yevropada o‘tkazilishi to‘g‘ri emas.
Bundan tashqari, AQSH 2026 yil o‘rniga turnirni 2022 yilda qabul qilishi mumkin. Ularda tajriba bor. Shuningdek, Yaponiya ham musobaqani o‘zida qabul qilishi mumkin. Navbatdagi jahon chempionatida 48ta emas, 32ta terma jamoa qatnashadi. Shu bois, FIFA mezbon mamlakatni almashtirishda muammoga duch kelmaydi», —dedi Blatter "Bild" nashriga bergan intervyusida.