ФИФА собиқ президенти Йозеф Блаттер коррупция билан боғлиқ можаролар туфайли 2022 йилги жаҳон чемпионатини Қатарда ўтказишдан воз кечишни таклиф қилди.
Аввалроқ АҚШ адлия вазирлиги бир неча йиллик суриштирув ишларидан кейин Россия ва Қатарни пора эвазига Мундиал мезбонлигини қўлга киритганликда айблаб чиққан эди.
«Коррупция билан боғлиқ можаролар туфайли 2022 йилги жаҳон чемпионатини Германия ўзида қабул қилиши мумкин. Аммо ЖЧ-2018 Россияда ўтганини инобатга олсак, турнир кетма-кет 2 марта Европада ўтказилиши тўғри эмас.
Бундан ташқари, АҚШ 2026 йил ўрнига турнирни 2022 йилда қабул қилиши мумкин. Уларда тажриба бор. Шунингдек, Япония ҳам мусобақани ўзида қабул қилиши мумкин. Навбатдаги жаҳон чемпионатида 48та эмас, 32та терма жамоа қатнашади. Шу боис, ФИФА мезбон мамлакатни алмаштиришда муаммога дуч келмайди», —деди Блаттер "Bild" нашрига берган интервьюсида.