Italiya futboli rahbarlari mavsumni davom ettirishning g‘oyasini muhokama qilishdi. Dastlabki rejaga ko‘ra, mavsum Italiya kubogining yarim final bosqichi doirasidagi «Yuventus» – «Milan» va «Napoli» – «Inter» uchrashuvlari bilan qayta boshlanadi. Bu esa A seriyani boshlashdan oldin ma’lum vaqtni yutishga yordam beradi.


Ushbu taklif A seriya texnik kengashi a’zolariga ma’qul keldi. Shundan so‘ng Italiya kubogi finali ham darhol o‘tkazilishi mumkin. Undan keyin esa A seriyaning 25-turi doirasida o‘tkazilmay qolgan 4ta o‘yin bo‘lib o‘tadi. Shu bois, Italiya chempionatining to‘laqonli starti biroz orqaroqqa suriladi.

Italiya chempionatining qayta boshlanish sanasi sifatida 24 may, 31 may yoki 7 iyun sanalari tilga olinayotgan edi. Avvalroq Italiya sog‘liqni saqlash vaziri Italiya chempionatini bir oy ichida davom ettirish mumkinligini ta’kidlagan edi.