Daniel Parexo. "Valensiya" klubi pleymeykeri 31 bahorni qarshi oldi. Jamoa sardori ikki yil oldin klubi bilan shartnomasini uzaytirgan, 2022 yilga qadar “ko‘rshapaklar” klubida faoliyat olib boradi. Parexo boshqa ispan futbolchilaridan nimasi bilan farq qiladi?

Uning o‘yinini kuzata turib, men Daniel asr boshlaridagi ispan futbolidan kelib qolganmikan deb o‘ylayman. Chunki u ham o‘sha paytlarning ispan yulduzlari kabi yoshlar o‘rtasidagi turnirlarni yondirgan – 2007 yili 19 yoshgacha Yevropa chempioni, 2011 yili 21 yoshgacha qit’a g‘olibi – kattalashgani sari o‘sha darajasini saqlab qolmagan iste’dod. Oldingi "qizil furiya" yigitlari shunday bo‘lardi. Lekin avval ilk akademiyasi – “Real”da muvaffaqiyatli o‘ynab ketolmagan bo‘lsa-da, "Xetafe"dagi yaxshi o‘yinlari evaziga 22 yoshida "Valensiya" safiga kelib qo‘shildi. Deyarli o‘n yil davomida bu jamoaning safida o‘ynab kelmoqda. Muqim o‘yinchi.

 Bugungi "Valensiya"ning usiz tasavvur qilishimiz mushkul. Parexo yaqinda katta intervyu berdi va unda yosh futbolchilarga zo‘r maslahatlar berib o‘tdi: “Agar bir joyda baxtingizni topsangiz, u yerni tark etishni aslo o‘ylamang. Keyin bu baxt shu joyga qaytib kelganingizda ham topilmay qoladi”.

Juda ko‘p yulduzlar bu gaplar nechog‘liq haqiqatligini isbotlashdi. Parexo esa, bir jamoada ko‘kardi. To‘g‘ri, yoshligida Yevropa chempioni bo‘lib yurgan yigit kattaroq klublarga loyiq, dermiz. Ammo yangi maskanlarida o‘ynab ketishi aniq emas-da.

Parexo bugungi kunda Ispaniya terma jamoasiga jalb etilgan va balki, balki kattalar o‘rtasidagi Yevropa chempionatida ham zafarli natijalar qayd etib, yoshlik davriga qaytar va futbolni armonsiz tark etar. Axir, unda bunga bugungi kunda yetarli potensial borku...

Xayrulla Hamidov.