O‘zbekiston Respublikasi Vazirlar Mahkamasi huzuridagi O‘zbekiston Milliy antidoping agentligi uy sharoitida mashg‘ulotlar olib borayotgan sportchilardan doping qoidalarini buzmaslik va ularga qat’iy rioya qilishni tavsiya qildi.
«Hurmatli sportchilar va murabbiylar.
Koronavirus pandemiyasi ko‘plab sport tadbirlarini, jumladan eng yirik sport musobaqalari bo‘lmish 2020 yilgi yozgi Olimpiya va Paralimpiya o‘yinlarining 2021 yilga qoldirilishiga sababchi bo‘ldi.
Hozirda barcha sportchilar uy sharoitida mustaqil ravishda, murabbiylar hamda shifokorlarning onlayn nazorati va ko‘magi ostida mashg‘ulotlarni bajarishda davom etmoqda.
Karantin davomida o‘z sport qobiliyatingizni saqlash maqsadida yaratilgan sharoitlardan unumli foydalanishingizni, sport tartibiga qat’iy rioya qilishingizni hamda sportda taqiqlangan dori-darmonlar va moddalarni iste’mol qilmaslikni so‘raymiz», — deyiladi tashkilot bayonotida.
