24 aprel. Italiya himoyachilari bilan dong taratgan paytlari Alessandro Kostakurta nomi ham tilga olinadi. 1966 yilning 24 aprelida tug‘ilgan ajoyib futbolchi 54ga kirdi. Verese viloyatida tug‘ilgan, “Milan” klubining yulduzli tarkibining bir qismi bo‘lgan, bugungi kunda Italiyaning Sky sport telekanali sharhlovchisi. 1991 yilning "Italiya go‘zali"ga uylangan, Axil ismli farzandi bor.

Maydonda porlagan paytlari uni Billi deb chaqirishardi. Sababi, Alessandro tashqi ko‘rinishi nozik va Billi kompaniyasi reklamasi ketadigan Milanning basketbol klubi muxlisi edi.
Kostakurta Milan klubi akademiyasidan chiqqan, klubning haqiqiy tarbiyalanuvchisi. Shu bois, yigirma mavsumga yaqin bir klub tarkibida o‘ynaganini oddiy shu fakt bilan izohlaymiz. Boshida Milanda ishonishmagan va bir-ikki mavsum pastki ligada o‘ynagan hamda Arrigo Sakkining e’tibori bilan 1987 yildan boshlab rossoneri safida o‘z joyini muqimlashtirib borgan.
Faoliyatiga qarang: uch bora Yevropa superkubogi, ikki marta qit’alararo kubok, besh marta YECHL g‘olibi (uchtasini turnir nomi YECHK bo‘lganida qo‘lga kiritgan). Yetti bora skudetto sohibi.

Kostakurta Italiya terma jamoasida ham zo‘r o‘ynagan. Ayniqsa, skuadro adzurra finalgacha borgan, yanada ko‘plab muxlislar orttirgan 1994 yilgi AQSH mundialida. FIFAning ramziy terma jamoasida uning o‘rni naqd edi.
Yanada zo‘r tomoni, u “Milan” klubidagi faoliyati yakunlanayotganda juda ko‘p takliflar bo‘lsa-da, futbol bilan xayrlashishni ma’qul ko‘rdi. Ketish oldidan bitta gap aytdi: “Meni kelajakda “Milan”dan boshqa libosda ko‘rishlarini istamayman”.
Shunaqa o‘yinchilari borligi uchun ham Italiya futbolining peshonasidan o‘pgilaring kelib ketadi.