Fransiyalik futbolchi Luis Suares bilan bo‘lib o‘tgan janjaldan keyin haqiqiy dahshatni boshdan kechirgan.
Angliyaning "Manchester Yunayter" klubi sobiq himoyachisi Patris Evra Luis Suares bilan bo‘lib o‘tgan janjalni yodga oldi. Urugvaylik futbolchi o‘shanda «Liverpul» klubida o‘ynardi va Evraga irqiy munosabatda bo‘lgandi. 2011 yilda fransiyalik futbolchi har kuni turli xil tahdidlar ostida qolaverdi.
«Menga: «Biz hozir turmadamiz, turmadan chiqqanimizda seni va oilangni o‘ldirib yuboramiz» deb xat yuborishgandi. Xuddi shunday xatlarni ikki oy davomida oldim. Har tarafimda xavfsizlik xodimlari bor edi, tansoqchilar bilan birga yuradigan bo‘lib qolgandim. Nima uchun insonlar meni bu darajada yomon ko‘rishlarini tushunmasdim. Ular shunchaki haqiqatni bilishmagan.
O‘shanda Suares menga: «Menga tegma, men qora tanli insonlar bilan gaplashmayman»-degandi. Biz buni hal qilish jarayoniga borganimizda esa u yolg‘on gapirishni boshladi. O‘shanda u "negro" so‘zi "do‘st" ma’nosini anglatadi deb o‘ylaganini aytgandi.
Baribir u barchasini tan olgandi va uni sakkizta uchrashuvga diskvalifisiya qilish bilan bir qatorda, katta miqdordagi jarimaga ham tortishgandi», – deb esladi Evra.
Evra keyinchalik Suares bilan munosabatlarni yaxshilashga muvaffaq bo‘ldi. Uchrashuvlarning birida ular qo‘l berib salomlashishgandi.
