Bugun MOQ vise-prezidenti, O‘zbekiston sport kurashlari assosiasiyasi raisi va o‘zbek sportining jonkuyarlaridan biri Salim Kirgizbayevich Abduvaliyev o‘zining yubiley 70 yillik tavallud ayyomini nishonlamoqda.

Hurmatli Salim Kirgizbayevich,

O‘zbekistonda bir necha yillardan beri jismoniy tarbiya va sportni rivojlantirish, Olimpiya harakati rivojiga qo‘shayotgan munosib hissangizni yuksak qadrlaymiz. Siz nafaqat mamlakatimiz, balki butun dunyoda sport kurashlarining rivoji yo‘lida hissa qo‘shib kelayotgan mutaxassis hisoblanasiz.

Sobiq Ittifoq paytida Arsen Fadzayev, Maxarbek va Aslan Xadarsev kabi polvonlarni jahonga mashhur qilgan mutaxassislardan birisiz. Ularning Olimpiya o‘yinlari va jahon chempionatlarida g‘olib bo‘lib, shohsupaga ko‘tarilishlarida sizning hissangiz juda katta. Mustaqillik yillarida esa O‘zbekiston sport kurashlari assosiasiyasi raisi sifatida Aleksandr Dokturishvili, Artur Taymazov, Soslan Tigiyev, Bekzod Abdurahmonov, Ixtiyor Navro‘zov, Elmurat Tasmuradov, Mo‘minjon Abdullayev va Magomed Ibragimovlar kabi polvonlarning yirik sport musobaqalarida yurtimiz nomini dunyoga tanitishdagi sa’y-harakatlaringizni qadrlaymiz.

Shuningdek, O‘zbekiston Milliy olimpiya qo‘mitasi vise-prezidenti sifatida yurtimizda sport kurashlari bo‘yicha kuchli maktab shakllanishida qo‘ygan poydevoringiz, poytaxtimizda kattalar o‘rtasidagi Osiyo va jahon chempionati kabi musobaqalarning o‘tkazilishi yo‘lida ko‘rsatgan jonbozligingizni, biz bilan yelkama-elka olib borayotgan faoliyatingizni hurmat qilamiz.

Bugungi shodiyona kunda sizni 70 yoshlik qutlug‘ ayyomingiz bilan Milliy olimpiya qo‘mitasi, katta sport jamoatchiligi va yurtimizdagi Olimpiya harakatining barcha ishtirokchilari nomidan muborakbod etishga ijozat bergaysiz. Sizga uzoq umr, mustahkam sog‘liq va sportimiz taraqqiyoti yo‘lidagi ishlaringizga rivoj tilaymiz.

O‘zbekiston Milliy olimpiya qo‘mitasi