Yengil vazn toifasida UFC chempioni Habib Nurmagomedov koronavirus sabab yuzaga kelgan og‘ir vaziyat sabab Dog‘iston xalqiga murojaat qildi.

«Koronavirus tufayli yuzaga kelgan vaziyat sabab Dog‘iston xalqiga murojaat bilan chiqmoqchiman. Dog‘istondagi holat juda og‘ir, o‘ta achinarli. Shifoxonalar to‘lgan, ko‘plab odamlar kasallangan, juda ko‘plab qurbonlar bo‘ldi. Aynan hozir birlashadigan vaqtimiz keldi. Xarakter va tartib intizomni namoyish qilish vaqti keldi. Faqat birlashgan holda bu virusni yengish mumkin.

Shifokorlar va ularning talablariga quloq solishimiz kerak. Chunki ular vaziyatni yaxshiroq tushunadi. Ular kasal bo‘lishimizni xohlamaydi, shifoxonalar to‘lib ketishini istamaydi. Shundoq ham u yerda joy yetmayapti, tibbiy jihoz va dori-darmonlar yetishmayapti. Nafaqat Dog‘iston yoki Rossiya, butun dunyo bunga tayyor emas edi. Milliardlab odam uyda o‘tirishga majbur bo‘lishi 3-4 oy avval kimning ham xayoliga kelibdi deysiz. Faqat izolyasiya bu muammoni yecha oladi.

Bu kasallikni yengib o‘tgan o‘nlab mamlakatlar bor. Ular faqat birlashgan holda va shifokorlar gapiga quloq solgan solib, uni yengib o‘tdi. Bu endi boshlangan vaqtda Dog‘istondagi ko‘pchilik shifokorlarning gapiga ishonmadi. Bundan kimlardir manfaatdorligini aytishdi, bilmadim bu vaziyatdan kimlar manfaatdor bo‘lishi mumkin? Hamma kasallanyapti, farroshmisan yoki prezident, farq yo‘q, bu barchaga yuqmoqda. Bu virus ismingni yoki kasbingni so‘rab o‘tirmaydi, u faqat boy yoki faqat kambag‘al tomon bormaydi, hamma kasallandi.

Bir necha kundan so‘ng Ramazon hayiti bayrami bo‘lib o‘tadi. Iltimos, o‘sha kuni yaqinlaringizni yoniga bormang va kelganlarni qabul qilmang. Hayit namozini uyda ado eting.

Juda og‘ir vaziyat. Yaqin qarindoshlarimning 20 nafardan ortig‘i reanimasiyaga tushdi. Ularning ko‘pchiligi endi yo‘q, juda ko‘plab tanishlarim, yaqin do‘stlarimning ota-onalari vafot etdi. Biz yoshlarda immunitet bor, biroq keksalar buni juda og‘ir o‘tkazmoqda. Ota-onalarimiz, bobo-buvilarimiz haqida o‘ylang.

Yana bir bor yaqinlashib kelayotgan muqaddas ayyom bilan barchani tabrikmayman. Bu bayramni yil davomida kutamiz, biroq hozir o‘z hayotimizni saqlab qolishimiz muhim.

Shifokorlar talabini bajaring, Hayit namozini va bayramini uyda o‘tkazishni talab qilayotgan insonlar gapiga quloq soling. Keling dovyuraklik, xarakter, sabr va tartib intizomni namoyish qilamiz. Assalomu alaykum va rohmatullohi va barokatuh», — deydi Nurmagomedov.

Rasmiy ma’lumotlarga ko‘ra, Dog‘istonda koronavirus bilan kasallanganlar soni 3460 nafarni tashkil qilmoqda. 1800 dan ortiq kishi tuzalgan bo‘lsa, 29 ta o‘lim holati qayd etilgan.