Bugun Germaniya Bundesligasida navbatdagi tur o‘yinlari start oladi. Turni «Gerta» va «Union» ishtirokidagi Berlin derbisi ochib beradi. Futbolda derbilarni qadri qanchalik yuqori ekanligi ma’lum, bu qarama-qarshilikni poytaxt derbisi ostida o‘tishi esa keskinlikni oshiradi.

«Union» Berlin bu mavsum tarkib e’tibori bilan qaraganda muvaffaqiyatli mavsum o‘tkazmoqda. Ta’kidlash kerakki, klubni 3 yildan buyon boshqarib kelayotgan Urs Fisher hujumkor futbol namoyish etadigan jamoa shakllantirgan. Uning jamoasi ayniqsa, grandlarga munosib qarshilik ko‘rsatishi bilan bu mavsum ko‘pchilikni e’tiborini tortmoqda.

«Gerta»da esa ketma-ket murabbiylar almashuvi yuz berganligini yaxshi bilasiz. Hozirgi bosh murabbiy Bruno Labbadia jamoaga yaxshi kirishib keta oldi. «Gerta» pandemiya davrida yuzaga kelgan tanaffusdan keyin hammasini yaxshi boshladi, jamoa o‘tgan turda «Xoffenxaym»ni yirik hisobda mag‘lubiyatga uchratdi.

Bugungi uchrashuvga qiziqishni oshiradigan yana bir jihat, o‘yin turnir jadvalini nuqtai nazaridan ham juda jiddiy kechadi. Ayni paytda «Gerta» 31 ochko bilan 11 o‘rinda, «Union» Berlin esa 30 ochko bilan keyingi pog‘onada bormoqda. Demak, bugun jadvaldagi qo‘shnilar jangiga ham guvoh bo‘lamiz.

Uchrashuv soat 23:30da boshlanadi. O‘yinni telekanalimizda jonli efirda tomosha qiling.

Abdulla Nurmonov.