Yaqindagina "Andijon" futbol klubi bosh murabbiyiga aylangan Viktor Kumikov Qozog‘istonning Sports.kz saytiga intervyu berdi.

— Viktor Balyutovich, karantin paytida vaqtni qanday o‘tkazyapsiz?
— Karantin paytida O‘zbekistonda edim. Mehmonga kelgandim, keyin shu yerda qolib ketdim. Taqdir shekilli!

— Koronavirus butun dunyoda futbolning rivojlanishiga jiddiy ta’sir ko‘rsatdimi?
— Virus futbolga ta’sir ko‘rsatdi. Qanchalik jiddiyligi esa karantin qancha vaqt davom etishiga bog‘liq.

— «Atirau» bosh murabbiyi lavozimini tark etganingizdan keyin futbolni sog‘inganmidingiz?
— Unchalik emas. Shug‘ullanadigan ishlarim bor edi. Murabbiylik ishi bor ekan — bu albatta yaxshi.

— «Andijon»da ishlash varianti qanday paydo bo‘ldi?
— Barchasi oddiy: klub vakillari hozir O‘zbekistonda ekanimni bilib, men bilan aloqaga chiqishdi. Barchasini kelishib oldik.

— O‘zbekiston chempionatining dastlabki 3ta turidan keyin «Andijon» musobaqa jadvalining quyi pog‘onasini egallab turgan edi. Bu holat sizni xavotirga solmaydimi?
— Yo‘q, chempionat endi boshlandi. Men jamoaning o‘yinlarini ko‘rdim, vaziyatni o‘nglasa bo‘ladi.

— Jamoa oldingizga qanday vazifa qo‘ymoqda?
— Katta natijalar qo‘yilmadi, ammo kamida 7-o‘rinni egallashimiz kerak. Rahbariyat vaziyatga real qaramoqda. Moliyalashtirish taxminan shunday darajada, ammo kelajakka umid bor.