Turinning “Yuventus” jamoasi so‘nggi yillarda ketma-ket Italiya chempionligini qo‘lga kiritayotgani hech kimga sir emas. Tan olish lozim, “Yuve”ning g‘alabalarida o‘rinli transferlar katta rol o‘ynaydi. Bir tasavvur qilib ko‘ring, agar jamoa safida faqat akademiya tarbiyalanuvchilari harakat qilishganida, tarkib qanday ko‘rinishda bo‘lar edi?
Darvozabon. Antonio Mirante
Antonio “Yuventus” akademiyasiga 2000-yilda qabul qilingan bo‘lib, o‘zining ilk professional shartnomasini 2004-yilda imzolagan. Afsuski, u “abadiy Buffon” davri qurboni bo‘ldi. Klub yosh darvozaboni qatorasiga 3 yil davomida turli klublarga ijara asosida jo‘natdi va yakunda Mirante “Sampdoria” safiga borib qo‘shildi. Afsuski, qahramonimiz u yerda ham muhim o‘rin olishni udday olmadi va “Parma” darvozasini qo‘riqlashni boshladi. Keyin “Bolonya”da ko‘rinish berdi. Ayni damda “Roma”ning ikkinchi darvozaboni sanaladi.
Himoyachilar. Dominiko Krishito
Dominiko himoyadagi universal futbolchi. U qanotda va markazda birdek faollik namoyish eta olishiga qaramay, “Yuve” safida atigi 8 ta o‘yinda maydonga tushdi xolos. O‘yin amaliyoti yetishmaganligi bois uni “Jenoa”ga ijaraga berib yuborildi. Krishito yangi jamoasi tarkibida juda yorqin o‘yin namoyish etgani bois hatto terma jamoadan ham chaqiruv oldi.
2011-yilda uning transfer huquqini “Zenit” sotib olganidan xabaringiz bor. Himoyachi naqd 7 yil davomida piterliklar sharafini munosib himoya qildi va shartnomasi yakunlangach yana “Jenoa”ga qaytib ketdi.
Daniyele Rugani
Italiyada koronavirus bilan birinchilardan bo‘lib og‘rigan Rugani “Yuventus” akademiyasi tarbiyalanuvchisi sanaladi.
Mavsum so‘nggida klubni tark etishi kutilayotgan Rugani “Yuventus” jamoasiga rotasiya chog‘ida katta naf keltirdi, biroq top darajadagi himoyachiga aylana olmadi.
Federiko Mattyello
Federiko “Yuventus”ning yoshlar jamoasi yetakchisi bo‘lganiga qaramay, himoyadagi raqobat sababli Turin klubi sharafini atigi 2 ta uchrashuvdagina himoya qildi xolos.
Jamoa bilan shartnomasi yakunlangach, Italianing turli jamoalarida to‘p surishni boshladi. Afsuski, birorta jamoada o‘rnasha olmadi va grand jamoalar radaridan yo‘qolib qoldi. Shunday bo‘lsada, u hali juda yosh va faoliyatini qayta ishga tushirishi mumkin.
Rojerio
Braziliyalik himoyachi klubga 15 yoshida sayyoramizning eng iqtidorli futbolchilaridan biri sifatida tashrif buyuradi. Jismonan baquvvat, tehnikasi kuchli bo‘lishiga qaramay unga biror marotaba maydonga tushish imkoniyati yaratib berilmaydi. Oqibatda, “Yuve” himoyachini o‘zining norasmiy “farm klubi”ga aylanib ulgurgan “Sassuolo”ga jo‘natib yubordi. E’tiborlisi shundaki, himoyachi qisqa muddat ichida yangi jamoasining asosiy futbolchisiga aylandi v ajoyib o‘yinlar ko‘rsatishni boshladi. Tez orada klub uni yana Turinga qaytarishi hech gap emas.
Yarim himoyachilar. Luka Marone
Luka 8 yoshidan boshlab “Yuventus” akademiyasiga qabul qilingan. Barcha yosh toifasidagi jamoalarda to‘p surgach, Chiro Ferrera uni asosiy jamoaga o‘tkazadi. Qisqa muddat “Yuve”ning asosiy tarkibida ko‘rinish bergan futbolchi murabbiy iste’foga chiqqan zaxira o‘rindig‘ida ham ko‘rinmay qoldi. Keyinchalik klub uni turli klublarga ijaraga berishni boshlab yubordi. Ayni damda uning transfer huquqi “Verona”ga tegishli, biroq u “Krotone”da ijara asosida to‘p surmoqda.
Franchesko Kassata
Kassata ham 8 yoshida “Yuventus” akademiyasida shug‘ullanishni boshlaydi. Afsuski, akademiyaning 80 foiz tarbiyalanuvchilari singari u ham o‘z imkoniyatiga ega bo‘lmay turib o‘zi uchun boshqa jamoa izlashga tushib ketadi.
“Yuve” uni avvaliga “Sassuolo”ga jo‘natdi, biroq Kranchesko ishonchni oqlay olmadi. Keyin “Jenoa”ga yuborildi. Tan olish lozim, bugungi kunda futbolchi o‘z o‘yinini topib oldi.
Filippo Romanya
Filippo chinakam universal futbolchi. U tayanch zonasida ham markaziy himoyada ham birdek naf keltirishga qodir. Afsuski, futbolchi Turinda muhim o‘rnasha olmadi va 2017-yilda uni “Kalyari” sotib oldi. Afsuski, yangi jamoasida ham Filippo kutilganidek o‘yin namoyish etmadi va “Sassuolo”ga ijara asosida berib yuborildi.
Hujumchilar. Sebastyan Jovinko
14 yoshida klub akademiyasiga tashrif buyurgan futbolchi o‘z davrida Italiyaning eng iqtidorli futbolchilaridan biri sanalar edi.
2007-yilda Turin klubi u bilan professional shartnoma imzolaydi va “Empoli”ga ijaraga berib yuboradi. 2010-yilda futbolchiga “Parma” jamoasi asosiy tarkibdan o‘rin naqd qilingan shartnoma taklif etadi va Jovinko taklifni qabul qiladi.
Oradan bir necha yil o‘tgach, Jovinkodagi o‘sishni ko‘rgan “zebralar” uni ortga qaytarishadi. Afsuski, Jovinko ikkinchi urunishda ham “Yuventus”da ushlanib qola olmaydi. Oqibatda, 2015-yil kutilmaganda Jovinko MLSga yo‘l oladi. Okean ortidagi eng kuchli futbolchilardan biriga aylangach, Saudiya Arabistonining “Al Xilol” klubi bilan shartnoma imzolaydi.
Chiro Immobile
Chiro Neapol shahrida tavallud topganiga qaramay, yoshligidan “Yuventus”ga muxlislik qilgan. Shu sababli, “Napoli” akademiyasi turib Turinga ko‘chib keladi.
Barcha yoshlardagi “Yuventus” klubi sharafini himoya qilgach, sekin-asta asosiy asosiy jamoada ko‘rinish berishni boshlaydi. Afsuski, tajribasizligi bois o‘z imkoniyatlaridan unumli foydalana olmaydi va “Yuve” uni 2013-yilda “Torino”ga sotib yuboradi.
Turinning boshqa bir jamoasida Chiro chinakamiga o‘zini anglaydi va mavsum to‘purariga aylanadi. Keyin “Borussiya Dortmund”ga o‘tgan futbolchi jamoaning o‘yin uslubiga mos kelmaydi va yana Italiyaga qaytadi. Ayni damda Rimning “Latsio” klubi bilan chempionlik uchun kurash olib bormoqda.
Moyze Kin
O‘tgan mavsumda “portlash”ni amalga oshirgan Moyze ham “Yuventus” akademiyasi mahsuli sanaladi. Jismonan baquvvat, kuchli zarba va so‘nggi pasga ega hujumchi o‘zining ilk professional mavsumidayoq barchaning e’tiborini qozondi va hatto Italiya terma jamoasidan chaqiruv oldi.
Keyinroq “Yuve” tarkibdagi hujumchilar zichligi bois “Everton”ga sotib yubordi. Afsuski, Moyze ayni damda APL o‘yin ritmiga moslasha olmayapti. Shunday bo‘lsada, u hali juda yosh va katta futbolda o‘z so‘zini aytishga qodir.
