Xabaringiz bor, koronavirus pandemiyasi sababli dunyoning ko‘plab mamlakatlari qatori O‘zbekistonda ham futbol uchrashuvlari va mamlakat ichki chempionati to‘xtatilgan edi.

O‘zPFL yuzaga kelgan vaziyatni inobatga olgan holda milliy chempionat bahslarini davom ettirish bo‘yicha o‘z rejalarini ishlab chiqqani va buni Superliga hamda PRO-Liga klublari bosh murabbiylari bilan muhokama qilgani haqida oldinroq xabar berilgan edi. Yaqinda O‘zbekistonda faoliyat ko‘rsatayotgan  Professional Futbol klublariga o‘z o‘quv mashg‘ulotlarini sanitariya qoidalari, normalari va gigiyena normativlariga muvofiq holda boshlashga ruxsat etildi.

O‘z oldiga yuksak marralarni qo‘ygan "Sho‘rtan" jamoasi ham mavsumga jiddiy tayyorgarlik ko‘rmoqda. Asror Aliqulov shogirdlari yig‘inda e’tiborni asosan jismoniy va taktik tayyorgarlikka, shuningdek jamoaviy o‘yinni shakallantirishga  qaratishgan. Rejaga muvofiq g‘uzorliklar ertaga sinov-nazorat uchrashuvini o‘tkazadi.

Ushbu uchrashuvda "Oq bo‘rilar"ga Ro‘ziqul Berdiyev boshqaruvidagi “Nasaf” jamoasi raqib bo‘ladi. Uchrashuv Qarshidagi Markaziy “Nasaf” stadionida soat 19:00da boshlanadi.

“Sho‘rtan” PFK matbuot bo‘limi.