Superliga restartiga taraddud ko‘rayotgan AGMK bugun navbatdagi nazorat uchrashuvini «Loko»ga qarshi o‘tkazdi.

Kecha «Rubin» bilan o‘yinda o‘ynagan futbolchilar bugun zaxira qoldirilgan bo‘lsa, kechagi bahsda qatnashmagan futbolchilar bugungi bahsni asosiy tarkibda boshlashdi. Kechagi uchrashuvni to‘liq o‘tkazmagan Abdulov va Yo‘ldoshev esa ikkinchi bo‘lim o‘rtasida zaxiradan o‘yinga qo‘shildi. Grigalashvili esa kichik jarohati bois bellashuvda ishtirok etmadi.

O‘yin qiziqarli va teng kurashlar ostida o‘tdi. Birinchi bo‘lim so‘nggiga yaqin olmaliqliklarning o‘ng qanotdan boshlangan hujumi samara keltirdi. Tursunovning ajoyib uzatmasini Mirjamol Qosimov boshi bilan darvozaga aniq yo‘lladi. Ikkinchi taymda «Loko» tarkibni yangi kuchlar bilan yangiladi. AGMK esa faqatgina yuqorida nomi keltirilgan darvozabon va himoyachini maydonga tushirdi. Biroq uchrashuvda boshqa gol urilmadi.

Shu tariqa ketma-ket ikkinchi kun nazorat uchrashuvida g‘alaba tantana qilindi.