To‘g‘ri, hamkasblarimiz odatda “Qirol liga” deb Angliya premyer ligasini nazarda tutishadi. Tomoshabopligi, tezlik va boshqa bir qancha ko‘rsatkichlar bo‘yicha bu borada bahsga hojat yo‘q. Lekin, aslida 94 yoshli Yelizaveta II taxtda ekan Angliyaga nisbatan qirol emas, baribir qirolicha so‘zi mosroq menimcha. Qirol lafzini esa Filipp VI va Ispaniyaga, o‘z-o‘zidan La Ligaga qoldiraylik.

Xullas, La Liga ham boshqalar kabi majburiy tanaffusga yo‘l olar ekan, juda ko‘plab savollarni ochiq qoldirgandi. Turnir jadvalining avvali-yu oxirida Katalon klublari. Pireneyda chempionlik kurashda – “Barselona” va “Real Madrid”. Yevrokuboklar yo‘llanmasi uchun bahsda – “Sevilya”, “Real Sosyedad”, “Xetafe”, “Atletiko M” va “Valensiya”. Jon saqlash uchun jangda – “Eybar”, “Selta”, “Malyorka”, “Leganes” va “Espanyol” bor.

To‘g‘ri, buyog‘iga kuchliga yanada oson bo‘ladi, kuchsizga yanada qiyin bo‘ladi, deyishyapti. Jon bor bu fikrda. Biroq masalan, pandemiyadan avval endigina tezlik olgan jamoalar bor edi. Yaqqol misol – “Selta”. So‘nggi 5 uchrashuvda mag‘lubiyatsiz kelib xavfli zonadan endigina chiqqandi. Yana o‘sha tezlikka qayta oladimi, yo‘qmi, bu – mavhum.

Qirolning qaytishini albatta birga kuzatamiz. Manzil o‘sha – “Futbol TV”. Ilk o‘yin bizni yana tarixga chorlaydi. Andalusiya tomon. Derbi. “Sevilya”-“Betis”. Bu haqda alohida to‘xtalamiz hali. Kuzatib boring.

Orif Tolipov.