Тўғри, ҳамкасбларимиз одатда “Қирол лига” деб Англия премьер лигасини назарда тутишади. Томошабоплиги, тезлик ва бошқа бир қанча кўрсаткичлар бўйича бу борада баҳсга ҳожат йўқ. Лекин, аслида 94 ёшли Елизавета II тахтда экан Англияга нисбатан қирол эмас, барибир қиролича сўзи мосроқ менимча. Қирол лафзини эса Филипп VI ва Испанияга, ўз-ўзидан Ла Лигага қолдирайлик.

Хуллас, Ла Лига ҳам бошқалар каби мажбурий танаффусга йўл олар экан, жуда кўплаб саволларни очиқ қолдирганди. Турнир жадвалининг аввали-ю охирида Каталон клублари. Пиренейда чемпионлик курашда – “Барселона” ва “Реал Мадрид”. Еврокубоклар йўлланмаси учун баҳсда – “Севилья”, “Реал Сосьедад”, “Хетафе”, “Атлетико М” ва “Валенсия”. Жон сақлаш учун жангда – “Эйбар”, “Сельта”, “Мальорка”, “Леганес” ва “Эспаньол” бор.

Тўғри, буёғига кучлига янада осон бўлади, кучсизга янада қийин бўлади, дейишяпти. Жон бор бу фикрда. Бироқ масалан, пандемиядан аввал эндигина тезлик олган жамоалар бор эди. Яққол мисол – “Сельта”. Сўнгги 5 учрашувда мағлубиятсиз келиб хавфли зонадан эндигина чиққанди. Яна ўша тезликка қайта оладими, йўқми, бу – мавҳум.

Қиролнинг қайтишини албатта бирга кузатамиз. Манзил ўша – “Футбол ТВ”. Илк ўйин бизни яна тарихга чорлайди. Андалусия томон. Дерби. “Севилья”-“Бетис”. Бу ҳақда алоҳида тўхталамиз ҳали. Кузатиб боринг.

Ориф Толипов.