Sekin-asta jonlanayotgan yevrofutbolda ligalar restartni derbilar orqali amalga oshirmoqda. Bundesligadan so‘ng katta sahnaga chiqayotgan La ligada ilk o‘yin siz-u bizga Andalusiya derbisi nomi bilan ko‘proq tanish. “Sevilya” – “Betis”.

Shu o‘rinda Germaniya futboli maydonga birinchi bo‘lib qaytgan bo‘lsada, nemislar avval boshdan ko‘zlangan maqsadiga yetolmadi, deyish mumkin. Sababi, bu yerda restartdan so‘ng o‘tgan bir-necha turdayoq intriga yo‘qqa chiqdi. E’tibor avval bo‘lgani singari uch asosiy ligaga qaratiladi yana.

Derbiga qaytaman. Ortiqcha yasamalikdan foyda yo‘q. Bu derbi masalan, Madrid va basklar derbisi bilan solishtirsak millionlab nigohlarni o‘ziga qarotolmaydi. Ammo, aynan qaytishdagi ilk o‘yin bo‘lgani bois yuqoridagi derbilardan kam bo‘lgamagan qiziqish yuzaga kelmoqda. Klublarning "Benito Vilyamarin"da o‘tgan birinchi davradagi o‘yini mehmonlarning g‘alabasi bilan yakunlagan. Hisob 1:1 bo‘lib turganida Lyuk de Yong “Sevilya” tarkibida g‘alaba goliga mualliflik qilgandi. (1:2)

Tarixdagi raqamlar ham bugun Lopitegi murabbiylik qilayotgan klub foydasiga: “Sevilya” – 87 g‘alaba , “Betis” 53 g‘alaba va duranglar – 43.

Aslida, bu raqamlarning bugungi o‘yinga ta’siri minimum. Bugun pandemiyadan kuchliroq bo‘lib chiqqan klub g‘alaba qozonadi. Ochko har ikki jamoaga ham kerak. “Sevilya” CHL yo‘llanmasi uchun kurashmoqda. “Betis” esa ikki qutbdan bir xil masofada bo‘lgani bois g‘alaba yevrokuboklar tomon, mag‘lubiyat Segunda tomon qo‘yilgan qadamga aylanishi mumkin. Xullas, motivasion faktorlar yetarli. Umid qilamiz, futbolchilar muxlislarsiz bo‘lsada bizga, teletomoshabinlarga futbolning eng go‘zal ranglarini namoyish eta oladilar.

Futbol TV, soat 01:00.
"Cevilya” – “Betis”

Orif Tolipov.