Superliganing 4-turidan o‘rin olgan bahsda Namanganning “Navbahor” jamoasi safarda Qarshining “Nasaf” klubi mehmoni bo‘ladi.

Mazkur jamoalar shu kungacha milliy chempionatlarimiz tarixida o‘zaro 46 marta ro‘baro‘ kelishgan. Ushbu o‘yinlarning 22 tasida “ajdarlar”ning qo‘li baland kelgan bo‘lsa, 12ta uchrashuvda “lochinlar” g‘alaba qozonishgan,  12ta bahsda esa jamoalar murosa ko‘chasini tanlashgan. To‘plar nisbati –

77-63, “Nasaf” foydasiga.

O‘zaro uchrashuvlarda “Nasaf” 78 ochkoni,  “Navbahor” esa 48 ochkoni qo‘lga kiritgan. Ushbu klublar o‘rtasidagi o‘yinlardagi eng yirik - 6:0 hisobi  Namangan va Qarshida qayd etilgan.

“Nasaf” hamda “Navbahor” jamoalari bungacha Qarshida 23 marta kuch sinashishgan. Mazkur bahslarning 18 tasida qarshiliklar zafar quchishgan bo‘lsa, 3ta uchrashuvda namanganliklar g‘alaba qozonishgan, 2ta o‘yinda esa durang qayd etilgan.

Qarshida o‘tkazilgan o‘zaro uchrashuvlarda “ajdarlar” “Navbahor” darvozasini 52 marta ishg‘ol etishgan bo‘lsa, “lochinlar” “Nasaf” darvozasiga  20ta to‘p kiritishgan.

Shuni ham ta’kidlash joizki, “Navbahor” ikki yildan buyon Qarshidan ochko bilan qaytmoqda. Jumladan, 2018 yili o‘tkazilgan uchrashuvda durang (1:1) natija qayd etilgan bo‘lsa, o‘tgan mavsumda “lochinlar” 1:0 hisobida g‘alaba qozonishgandi.   

Bo‘lajak uchrashuvda sevimli jamoamizga omad yor bo‘lishi va bu safar ham  Qarshidagi yoqimli an’anasini davom ettirishiga tilakdoshmiz.

“Navbahor” PFK matbuot xizmati.