Суперлиганинг 4-туридан ўрин олган баҳсда Наманганнинг “Навбаҳор” жамоаси сафарда Қаршининг “Насаф” клуби меҳмони бўлади.

Мазкур жамоалар шу кунгача миллий чемпионатларимиз тарихида ўзаро 46 марта рўбарў келишган. Ушбу ўйинларнинг 22 тасида “аждарлар”нинг қўли баланд келган бўлса, 12та учрашувда “лочинлар” ғалаба қозонишган,  12та баҳсда эса жамоалар муроса кўчасини танлашган. Тўплар нисбати –

77-63, “Насаф” фойдасига.

Ўзаро учрашувларда “Насаф” 78 очкони,  “Навбаҳор” эса 48 очкони қўлга киритган. Ушбу клублар ўртасидаги ўйинлардаги энг йирик - 6:0 ҳисоби  Наманган ва Қаршида қайд этилган.

“Насаф” ҳамда “Навбаҳор” жамоалари бунгача Қаршида 23 марта куч синашишган. Мазкур баҳсларнинг 18 тасида қаршиликлар зафар қучишган бўлса, 3та учрашувда наманганликлар ғалаба қозонишган, 2та ўйинда эса дуранг қайд этилган.

Қаршида ўтказилган ўзаро учрашувларда “аждарлар” “Навбаҳор” дарвозасини 52 марта ишғол этишган бўлса, “лочинлар” “Насаф” дарвозасига  20та тўп киритишган.

Шуни ҳам таъкидлаш жоизки, “Навбаҳор” икки йилдан буён Қаршидан очко билан қайтмоқда. Жумладан, 2018 йили ўтказилган учрашувда дуранг (1:1) натижа қайд этилган бўлса, ўтган мавсумда “лочинлар” 1:0 ҳисобида ғалаба қозонишганди.   

Бўлажак учрашувда севимли жамоамизга омад ёр бўлиши ва бу сафар ҳам  Қаршидаги ёқимли анъанасини давом эттиришига тилакдошмиз.

“Навбаҳор” ПФК матбуот хизмати.