Mehmonlar: Klub joriy mavsumda 23 ochko bilan 19-o‘rinda bormoqda.

O‘tgan mavsumdagi bo‘ydan baland sakrashdan so‘ng (13-o‘rin) bu mavsum Segundaga “sirpanishi” kutilmoqda. Sabablar bisyor. Bir yil avval, yozda jamoani 10 nafar muhim o‘yinchi tark etdi. Avgustda boshlangan chempionatdagi ilk g‘alaba klubga oktyabr oyida nasib etdi. Orada bosh murabbiy iste’foga chiqarildi.  Ligadagi eng kam gol urgan jamoa bo‘lib turibdi. Bugun bu yerdagi eng yorqin nuqta amaldagi coach. Matbuot anjumanlari so‘zlarini filterlab o‘tirmaydigan, o‘z vaqtida Serxio Agueroni zahira futbolchisiga aylantirgan, Breytueytni bo‘ralab so‘kkan - Xavyer Agirre. Biroq meksikalik murabbiy inqiroz menedjeri vazifasini yaxshi uddalay olmayapti, ochig‘i.

Mezbon: Ular haqida butun tanaffus davrida gap so‘zlar tinmadi.

Tarkibda kutilayotgan o‘zgarishlar, futbolda kutilayotgan o‘zgarishlarga munosabatlar, tarqoqlik va yig‘inchoqlik. Xullas, gap ko‘p edi. Bu gap so‘zlar o‘yinga ta’sir etib qolmaydimi, degan savol restartdan so‘ng o‘tgan ilk o‘yindayoq va hatto o‘sha matchning ilq daqiqasidayoq yo‘qqa chiqdi. Ular yaxshi kayfiyatda. Yetakchi a’lo his qilmoqda o‘zini. Murabbiy ancha o‘rganib qolgandek.

Darvoqe, klub 61 ochko bilan 1-o‘rinda bormoqda.

Bugun, soat 00:50. Futbol TV
“Barselona” - “Leganes”

O‘tkazib yubormang.

Orif Tolipov.