Germaniya chempionatining ushbu mavsum yakunlanishiga 2 tur qolganida chempion jamoa nomi aniq bo‘ldi. "Bavariya" safarda "Verder"ni mag‘lubiyatga uchratib, o‘z tarixida 30-chempionlikni rasmiylashtirdi.

Myunxenliklar birinchi bo‘limda raqib darvozasi tomon ko‘p hujumlar uyushtirishdi. Taym tugashiga 2 daqiqa qolganida Boateng bergan uzatma natijasida Levandovski darvozabon bilan yakkama-yakka vaziyatga chiqib, hisobni ochdi.

Ikkinchi bo‘limda ham tashabbus "Bavariya" tomonida bo‘ldi, ammo ular g‘alabani qo‘ldan chiqarishlari mumkin edi. Dastlab 77-daqiqada Noyer to‘pga chiqishda xatoga yo‘l qo‘ydi, ammo bremenliklar bo‘sh darvozani ishg‘ol eta olishmadi.

Oradan 2 daqiqa o‘tib Alfonso Devis ikkinchi sariq kartochka tufayli maydonni tark etdi. Ikkinchi bo‘limga qo‘shib berilgan daqiqalarda esa Noyer jamoasini muqarrar goldan qutqarib qoldi.

Shu tariqa, "Bavariya" Bundesliga g‘olibiga aylandi.

Germaniya Bundesliga, 32-tur
Verder – Bavariya 0:1 (0:1, 0:0)
Gol: 0:1 – 43 Levandovski.
Verder – Pavlenka, Gebre SelassiYE, Fridl, Velkovich (Pisarro, 88), Fogt (Langkamp, 46), Bitenkur (Sardjent, 62), Eggeshtayn, Rashisa (Bartels, 62), Klassen (Fyullkrug, 84), Moysander, Osako.
Bavariya – Noyer, Boateng, Pavar, Alaba, Kimmix, Gnabri (Lyuka Ernandes, 82), Devis, Goretska, Koman, Levandovski, Myuller.
Ogohlantirishlar: Devis (19), Eggeshtayn (56), Langkamp (88), Kimmix (89).
Chetlatish: Devis (79).