O‘zbekiston superligasi 5-tur doirasidagi "Qo‘qon-1912" - "Qizilqum" uchrashuvidan keyingi matbuot anjumaning birinchi qismida mezbonlar ustozi Baxtiyor Ashurmatov ishtirok etdi.

"Bugungi uchrashuv asabiy va qiyin tarzda kechdi. Murabbiy sifatida birinchi bo‘limdagi o‘yinimizdan ko‘nglim to‘lmadi. O‘ylagan rejalarimiz amalga oshmadi. Tajribali murabbiylardan biri sanalgan Tachmurod Agamurodov yaxshi jamoa shakllantirgani ko‘rinib turibdi. Ular birinchi taymda ancha tartibli o‘yin namoyish qilishdi.

Raqib jamoa a’zolari bizning qanday hujum uyushtirishimizni, qanday himoya qilishimizni oldindan bilgan holda harakat qildi. Shuning uchun birinchi bo‘limda qiynaldik.

Hisob o‘yinga yarasha bo‘ldi deya olmayman. Faqat so‘nggi daqiqalarda “Qizilqum” futbolchilari hujumga berilib ketishdi va biz bundan foydalandik. Bugungi o‘yin uchun, ayniqsa, ikkinchi bo‘limda o‘yinimiz qovushmayotgan paytda o‘zlarida kuch topib, o‘yinda burulish yasashgani uchun shogirdlarimga minnatdorchilik izhor etaman. Birinchi bo‘limda muxlislar yetishmagani sezilib turdi. Ularning tezroq maydonga qaytishlarini istaymiz. Bugungi g‘alabani muxlislarimizga bag‘ishlaymiz.

Birinchi bo‘limda o‘yinimiz qovushmadi, shuning uchun o‘zgarishlar qilishga harakat qildik. Zaxiradan maydonga tushgan futbolchilarimiz o‘yinga kirishib ketishdi. Bugungi o‘yin birinchi gol urilguncha edi. Negaki, raqib yaxshi himoyalanayotgandi. Birinchi golni kiritganimizdan keyin bosim ortga chekindi va yirik g‘alabani qo‘lga kiritdik. Birinchi bo‘limdagi xatolarni to‘g‘riladik, shuning evaziga ikkinchi bo‘limda boshqacha o‘yin namoyish etdik", — dedi Ashurmatov.