O‘tgan turda mag‘lubiyatga uchragan “Lokomotiv” o‘z maydonida avvalgi tur g‘alabaga erishgan “So‘g‘diyona”ni qabul qiladi. Turnir jadvalida «Loko» 6 ochko bilan 7-o‘rinni egallab turibdi. “So‘g‘diyona” esa 4 ochko to‘plagan holda 11-o‘rinda boryapti.

Aytib o‘tganimizdek, karantindan so‘ng dastlabki bahsda «Loko»ning omadi kelmadi. Jamoa o‘z maydonida “Metallurg” bilan kuch sinashib, kutilmaganda 0:3 hisobida imkoniyatni boy berdi. “So‘g‘diyona” esa aksincha Jizzaxda “Paxtakor”ni qabul qilib 1:0 hisobida g‘alabaga erishdi.

Bugungi o‘yin «Loko» uchun uydagi to‘rtinchi bellashuv bo‘ladi. Avvalgi uchta bahsda “temiryo‘lchilar” ikki bor zafar quchib, bir marta mag‘lub bo‘lishgan. “Temiryo‘lchilar” “Metallurg”ga imkoniyatni boy berishdan oldin uyda “Andijon” (2:1) va “Buxoro” (3:0) ustidan g‘alaba qozonishdi.

Shu paytgacha 4ta o‘yinda maydonga tushgan “So‘g‘diyona” hisobida faqat bitta g‘alaba bor. Ulug‘bek Baqoyev shogirdlari bungacha ikki bor mag‘lubiyatga uchrab, bir marta durang o‘ynashdi. “So‘g‘diyona” safardagi ikkita o‘yinda ham imkoniyatni boy bergan: 1-tur “Mash’al”ga 0:3 hamda 3-tur “Qoʻqon-1912”ga 1:2.

Ma’lumot uchun, soat 19:00da boshlanadigan o‘yinni “Sport” telekanalida to‘g‘ridan to‘g‘ri kuzatib boring.

Superliga 5-tur
“Lokomotiv” - “So‘g‘diyona”
Hakamlar: Aziz Asimov, Husniddin Shodmonov, Aleksandr Burov, Ilya Ilin
Nazoratchi: Dmitriy Roman
Komissar: Shohrux Said
20-iyun. “Lokomotiv” stadioni. 19:00