Ўтган турда мағлубиятга учраган “Локомотив” ўз майдонида аввалги тур ғалабага эришган “Сўғдиёна”ни қабул қилади. Турнир жадвалида «Локо» 6 очко билан 7-ўринни эгаллаб турибди. “Сўғдиёна” эса 4 очко тўплаган ҳолда 11-ўринда боряпти.
Айтиб ўтганимиздек, карантиндан сўнг дастлабки баҳсда «Локо»нинг омади келмади. Жамоа ўз майдонида “Металлург” билан куч синашиб, кутилмаганда 0:3 ҳисобида имкониятни бой берди. “Сўғдиёна” эса аксинча Жиззахда “Пахтакор”ни қабул қилиб 1:0 ҳисобида ғалабага эришди.
Бугунги ўйин «Локо» учун уйдаги тўртинчи беллашув бўлади. Аввалги учта баҳсда “темирйўлчилар” икки бор зафар қучиб, бир марта мағлуб бўлишган. “Темирйўлчилар” “Металлург”га имкониятни бой беришдан олдин уйда “Андижон” (2:1) ва “Бухоро” (3:0) устидан ғалаба қозонишди.
Шу пайтгача 4та ўйинда майдонга тушган “Сўғдиёна” ҳисобида фақат битта ғалаба бор. Улуғбек Бақоев шогирдлари бунгача икки бор мағлубиятга учраб, бир марта дуранг ўйнашди. “Сўғдиёна” сафардаги иккита ўйинда ҳам имкониятни бой берган: 1-тур “Машъал”га 0:3 ҳамда 3-тур “Қоʻқон-1912”га 1:2.
Маълумот учун, соат 19:00да бошланадиган ўйинни “Спорт” телеканалида тўғридан тўғри кузатиб боринг.
Суперлига 5-тур
“Локомотив” - “Сўғдиёна”
Ҳакамлар: Азиз Асимов, Ҳусниддин Шодмонов, Александр Буров, Иля Илин
Назоратчи: Дмитрий Роман
Комиссар: Шоҳрух Саид
20-июн. “Локомотив” стадиони. 19:00
