Taniqli sport sharhlovchisi Xayrulla Hamidov bugun tunda bo‘lib o‘tadigan "Everton" — "Liverpul" uchrashuvi haqida fikr bildirdi:

"Mersisaydliklar sog‘inib kutgan onlar yaqinlashmoqda. Bugun “Gudison park”da azaliy raqib bilan hisob-kitob o‘yini. Lekin "Liverpul" derbisida shahar bilan nomdosh klub g‘alaba qozongan taqdirda ham Klopp yigitlari chempion bo‘la olishmaydi, yana bir tur kutishga to‘g‘ri keladi. Aslida, hozirda o‘sha o‘ttiz yil sog‘inilgan g‘alabadan ko‘ra uni kutish, har bir o‘yinini kuzatish zavqliroq tuyulmoqda.

APLning har bir o‘yini bu mavsum go‘yo “Liverpul” uchun xizmat qilayotgandek. Zotan, yaqinginada pandemiya tufayli hammasi yo‘q bo‘lishi ham mumkin edi. Fransiyaga o‘xshab APLni to‘xtatsinlar edi, orziqib kutilgan chempionlik sarobga aylanardi yo chempion deb topishsa, xeyterlariga gap topilardi. Bu variant barchasini o‘z joyiga tushirdi. Jamoa haqli ravishda chempion bo‘ladi. Mayli, muxlislar bilan nishonlamasin, mayli, futbolchilarning o‘zlari-da shodliklarini baham ko‘rishmasin, ammo manzil “Liverpul”niki. Muhimi shu.

Bugun “Liverpul” qaytyapti, demakki, Yevropa futbolini rosmana qaytdi deb hisoblaymiz. Tag‘in bu restart derbidagi o‘yin bilan, vah-vah! Karlo Anchelotti “Napoli”da ushbu klubni to‘xtatib ko‘rsatgan edi, tumanli Albionda yirik hisobda yengildi. Ammo o‘sha uchrashuvdan so‘ng ancha suvlar oqdi, “Everton” so‘nggi daqiqagacha o‘ynashni o‘rgandi, himoyani tartiblab oldi va Risharlison misolida qahramonlik gollarini kiritishni boshladi.

Darvoqe, yaqinda braziliyalik hujumchi Virdjil van Deykni dunyoning eng zo‘r himoyachisi emasligini aytdi. “Uni men aldab o‘tganman, van Deykdan yaxshiroq himoyachilar bor dunyoda. Misol uchun Tyago Silva, Markinyos va Serxio Ramos”, deb aytgan Risharlison. Kloppga bu intervyuni yetkazgan bo‘lishsa kerak.

Ko‘ramiz, 23:00da Futbol tv telekanalida boshlanadigan o‘yinni o‘tkazib yubormang!

Ular qaytishmoqda!"