Таниқли спорт шарҳловчиси Хайрулла Ҳамидов бугун тунда бўлиб ўтадиган "Эвертон" — "Ливерпуль" учрашуви ҳақида фикр билдирди:

"Мерсисайдликлар соғиниб кутган онлар яқинлашмоқда. Бугун “Гудисон парк”да азалий рақиб билан ҳисоб-китоб ўйини. Лекин "Ливерпуль" дербисида шаҳар билан номдош клуб ғалаба қозонган тақдирда ҳам Клопп йигитлари чемпион бўла олишмайди, яна бир тур кутишга тўғри келади. Аслида, ҳозирда ўша ўттиз йил соғинилган ғалабадан кўра уни кутиш, ҳар бир ўйинини кузатиш завқлироқ туюлмоқда.

АПЛнинг ҳар бир ўйини бу мавсум гўё “Ливерпуль” учун хизмат қилаётгандек. Зотан, яқингинада пандемия туфайли ҳаммаси йўқ бўлиши ҳам мумкин эди. Францияга ўхшаб АПЛни тўхтатсинлар эди, орзиқиб кутилган чемпионлик саробга айланарди ё чемпион деб топишса, хейтерларига гап топиларди. Бу вариант барчасини ўз жойига туширди. Жамоа ҳақли равишда чемпион бўлади. Майли, мухлислар билан нишонламасин, майли, футболчиларнинг ўзлари-да шодликларини баҳам кўришмасин, аммо манзил “Ливерпуль”ники. Муҳими шу.

Бугун “Ливерпуль” қайтяпти, демакки, Европа футболини росмана қайтди деб ҳисоблаймиз. Тағин бу рестарт дербидаги ўйин билан, ваҳ-ваҳ! Карло Анчелотти “Наполи”да ушбу клубни тўхтатиб кўрсатган эди, туманли Альбионда йирик ҳисобда енгилди. Аммо ўша учрашувдан сўнг анча сувлар оқди, “Эвертон” сўнгги дақиқагача ўйнашни ўрганди, ҳимояни тартиблаб олди ва Ришарлисон мисолида қаҳрамонлик голларини киритишни бошлади.

Дарвоқе, яқинда бразилиялик ҳужумчи Вирджил ван Дейкни дунёнинг энг зўр ҳимоячиси эмаслигини айтди. “Уни мен алдаб ўтганман, ван Дейкдан яхшироқ ҳимоячилар бор дунёда. Мисол учун Тьяго Сильва, Маркиньос ва Серхио Рамос”, деб айтган Ришарлисон. Клоппга бу интервьюни етказган бўлишса керак.

Кўрамиз, 23:00да Футбол тв телеканалида бошланадиган ўйинни ўтказиб юборманг!

Улар қайтишмоқда!"