«Rostov» klubi rahbariyati Rossiya chempionatining 23-turi doirasida bo‘lib o‘tgan «Sochi»ga qarshi uchrashuv takroran o‘tkazilishini istamoqda.

Eslatib o‘tamiz, mazkur o‘yin arafasida «Rostov»ning 6 nafar futbolchisida koronavirus aniqlandi. Natijada jamoaning barcha a’zolari ikki haftalik karantinga yuborildi. Rostovliklar uchrashuvning boshqa muddatga ko‘chirilishini istashgan edi, ammo «Sochi» bunga rad javobini berdi. Natijada «Rostov» bu o‘yinga akademiya tarbiyalanuvchilarini yuborishga majbur bo‘ldi. O‘yin esa mezbonlarning 10:1 hisobidagi g‘alabasi bilan yakunlandi.

Moskvaning «Dinamo» klubi ham shunday holatga tushib qoldi. Jamoaning 3 futbolchisi koronavirusga chalingani aniqlangani uchun 21 iyun kuni o‘tkazilishi kerak bo‘lgan o‘yin raqib — "Krasnodar"ning roziligi bilan boshqa muddatga ko‘chirildi.

O‘xshash holatga nisbatan ikki xil yechim juda ko‘p muxlislar va mutaxassislarni hayron qoldirmoqda: «Sochi» — «Rostov» o‘yini o‘tkazildi, «Krasnodar» — «Dinamo» bahsi ko‘chirildi.

Sport24 tarqatgan xabarga ko‘ra, «Rostov» rahbariyati «Sochi»ga qarshi uchrashuv takroran o‘tkazilishiga erishmoqchi.