"Andijon" - "Bunyodkor" jamoalari o‘rtasidagi uchrashuv yakuniga yetgach tashkil etilgan matbuot anjumanining birinchi qismida mezbonlar katta murabbiyi Diyor Mirzaboyev ishtirok etdi:
– Uchrashuv haqida nima deyish mumkin? "Bunyodkor" o‘yinni nazorat qildi. Yigitlarimizga shijoat yetishmadi. Raqib bir kishi kam bo‘lib qolgan bo‘lishiga qaramay, hujumlarga ega bo‘ldi. Futbolchilarimizda nega shijoat kamligini ertaga o‘yinni tahlil qilib, keyin xulosa qilamiz.
- Usmonovning saviyasi jamoaga mos kelmayapti. Nima sababdan u doim maydonga tushmoqda?
- Tarkibimizda u bilan Litvyakov bor xolos. Shuning uchun maydonga tushirishga majburmiz. Hozircha imkoniyatimizdagi bor futbolchilardan foydalanyapmiz.
- "Bunyodkor" 10 kishi qoldi. "Andijon" bir ochko oldimi?
- Raqib 10 kishi bo‘lib ham hujumlarni tindirmadi. Shu sababli, bir ochkoni qo‘lga kiritdi deb o‘ylayman.
- Bekmuratovga nima deb ko‘rsatma berdingiz?
- Bir kishi ko‘p bo‘lib qolganimizdan keyin uni yonimga chaqirib sal oldiroqqa chiqib o‘ynashimiz kerakligini ko‘rsatdim.
- "Metallurg" bilan o‘yindan keyin boshqa darvozabon o‘ynay boshladi.
- Aslan Ahrorov debyutini bu yil o‘tkazdi. U yosh darvozabon. Ruhiy tushkullikka tushib qolgandi. Darvozabonlar murabbiyimizning ko‘rsatmasi sababli, Abdullayevga imkoniyat berdi. Shu sababli, Islomga imkoniyat berishga qaror qildik. O‘ylaymanki, Islom o‘tgan turda ham, bugun ham yomon o‘ynamadi.
