Superliga doirasidagi 8-turda AGMK Olmaliqda “Qo‘qon-1912”ni mehmon qiladi.

Mazkur jamoalar chempionat doirasida jami 12 marotaba to‘qnash kelishgan. O‘zaro uchrashuvlarda ustunlik AGMK tarafida: 7 g‘alaba, 2 durang va 3 mag‘lubiyat. To‘plar nisbati ham AGMK foydasiga: 22-15.

“Qo‘qon-1912” ayni paytda 15 ochko bilan turnir jadvalida 3-o‘rinda bormoqda. Jamoa o‘z maydonidagi barcha o‘yinlarda g‘alaba qozongan.

Qo‘qonliklar joriy mavsum raqiblar darvozasiga 14ta gol urib, bu borada faqatgina “Paxtakor”dan ortda qolishmoqda. Kiritilgan gollarga Murod Xolmuhammedov (6), Filipp Rayevas (2), Quvondiq Ro‘ziyev, Sardor Azimov, Aleksandr Merzlyakov, Sobit Sindarov, Otabek Haydarov va Suhrob Berdiyev mualliflik qilishgan.

Mirjalol Qosimov boshqaruvidagi AGMK esa qatorasiga 5 g‘alabadan keyin jadvalda “Qo‘qon-1912”dan 2 ochko ko‘p to‘plab, ikkinchi o‘rinda bormoqda.

AGMK chempionatda “Qo‘qon-1912” bilan birgalikda eng kam gol (-3) o‘tkazib yuborgan jamoa sanaladi.