Суперлига доирасидаги 8-турда АГМК Олмалиқда “Қўқон-1912”ни меҳмон қилади.

Мазкур жамоалар чемпионат доирасида жами 12 маротаба тўқнаш келишган. Ўзаро учрашувларда устунлик АГМК тарафида: 7 ғалаба, 2 дуранг ва 3 мағлубият. Тўплар нисбати ҳам АГМК фойдасига: 22-15.

“Қўқон-1912” айни пайтда 15 очко билан турнир жадвалида 3-ўринда бормоқда. Жамоа ўз майдонидаги барча ўйинларда ғалаба қозонган.

Қўқонликлар жорий мавсум рақиблар дарвозасига 14та гол уриб, бу борада фақатгина “Пахтакор”дан ортда қолишмоқда. Киритилган голларга Мурод Холмуҳаммедов (6), Филипп Раевац (2), Қувондиқ Рўзиев, Сардор Азимов, Александр Мерзляков, Собит Синдаров, Отабек Ҳайдаров ва Суҳроб Бердиев муаллифлик қилишган.

Миржалол Қосимов бошқарувидаги АГМК эса қаторасига 5 ғалабадан кейин жадвалда “Қўқон-1912”дан 2 очко кўп тўплаб, иккинчи ўринда бормоқда.

АГМК чемпионатда “Қўқон-1912” билан биргаликда энг кам гол (-3) ўтказиб юборган жамоа саналади.