Superliganing 8-turidan o‘rin olgan «Bunyodkor» - «Navbahor» (3:1) uchrashuvidan keyin o‘tkazilgan matbuot anjumanida mezbonlar bosh murabbiyi Vadim Abramov ishtirok etdi.

- Bugun ikki xil taym ko‘rdik. Birinchi bo‘lim bizning ustunligimizda o‘tdi, tanaffusdan so‘ng tajribali futbolchilari bor «Navbahor» o‘yinni nazorat qildi. Tanaffusgacha uchinchi golni urishimiz mumkin edi, lekin foydalana olmadik. Ikkinchi bo‘limda hisob qisqargach yigitlar o‘yin taqdirini hal qilgan uchinchi golni ura olishdi. Shunday vaziyatda o‘zlarini o‘nglab, g‘alaba to‘pini kiritishgani uchun ularga minnatdorchilik bildiraman. Fikrimcha, bugungi uchrashuv o‘tgan yili Farg‘onada bo‘lgan o‘yinga o‘xshab ketdi. O‘shanda ham biz birinchi taymda raqib darvozasini ikki marta ishg‘ol qilgandik. Tanaffusdan so‘ng mezbonlar bugungidan farqli ravishda ikki marta javob qaytarishgandi. Yakunda g‘alabani ilib ketgandik. Bugun ham hisob boshqacharoq bo‘lishi mumkin edi. Lekin hisob 2:1 bo‘lib turganida mehmonlar emas, biz gol urdik va bu bizning omadimiz bo‘ldi.