«Liverpul» yarim himoyachisi Adam Lallana 2019/20 yilgi mavsum yakunida jamoani tark etadi. Bu haqida «qizillar» bosh murabbiyi Yurgen Klopp ma’lum qildi.

«Adam jamoani tark etishi barcha uchun tushunarli. Garchi u hali ketmagan bo‘lsa-da unga bog‘liq barcha narsani sog‘inyapman. Lallana ajoyib o‘yinchi, faoliyatim mobaynida u kabi mashg‘ulotlarga katta ta’sir o‘tkazadigan futbolchini ko‘rmaganman. U aql bovar qilmas professional.

Kelajakdagi faoliyatiga omadlar tilayman. Menimcha, Adam allaqachon bu jamoa afsonasiga aylandi. Endi u boshqa klubda ham ushbu maqomni qo‘lga kiritishi mumkin», — deydi Klopp.

Lallana 2014 yilda «Sauthempton»dan «Liverpul» safiga o‘tgan. So‘nggi yillarda jarohatlar qurshovida qolib ketgan futbolchi mersisaydliklar safida 178 o‘yin o‘tkazdi va 22 ta gol urdi.

Joriy mavsum restartidan keyin 32 yoshli futbolchi hali maydonga tushmadi. Pandemiyadan avval Adam jamoaning Premyer Liga ushbu mavsumidagi 15 o‘yinida qatnashgandi.