Avstraliya va Yangi Zelandiya ayollar o‘rtasida futbol bo‘yicha 2023 yilgi jahon chempionatiga mezbonlik qilishadi. Ta’kidlash joiz, ayollar o‘rtasidagi mazkur turnir tarixida birinchi marta bir yo‘la ikki mamlakatda o‘tkaziladi. Bu mamlakatlarning birgalikdagi buyurtmasi 35 ovozdan 22 tasini olishga muyassar bo‘ldi. Bu turnirni o‘tkazishga Kolumbiya va Yaponiya ham da’vogarlik qilgan edilar. Biroq keyinchalik Yaponiya koronavirus pandemiyasi sababli o‘z buyurtmasini bekor qildi.

«Avstraliya va Yangi Zelandiyada ayollar o‘rtasida futbol bo‘yicha 2023 yilgi jahon chempionatini o‘tkazish bizning ayollar futboliga e’tiborimiz, tenglik va adolatga sodiqligimizning ifodasi bo‘ladi. Bu ayollar futbolini mintaqamizda va uning tashqarisida rivojlanttirish uchun qudratli poydevor yaratadi», – deyiladi Avstraliya Bosh vaziri Skott Morrisson va uning yangi zelandiyalik hamkasbi Jasindi Ardernning qo‘shma bayonotida.

Shuningdek, bu ilk marotaba 32 jamoa ishtirok etadigan birinchi jahon chempionatidir. Turnirni o‘tkazishning aniq muddatlari hozircha noma’lum.

“FIFA kengashi 2023 yilgi jahon chempionatidan boshlab turnirda avvalgi 24 jamoa o‘rniga 32 jamoa ishtirok etishi qarorini qabul qilgan. Bu ayollar futbolini yanada rag‘batlantirishga ijobiy ta’sir ko‘rsatadi”, – dedi FIFA prezidenti Janni Infantino.

Ayollar o‘rtasida jahon chempionatlari har to‘rt yilda o‘tkaziladi. So‘nggi JCHni Fransiya qabul qilgan edi. O‘shanda final uchrashuvida AQSH futbolchi qizlari Niderlandiya jamoasi ustidan g‘alaba qozongan edilar. Umuman, amerikalik ayol futbolchilar jahonda eng kuchli jamoadir. Ular to‘rt marotaba jahon chempioni bo‘lganlar.