Xabaringiz bor, U-19 yoshlar terma jamoalari o‘rtasidagi navbatdagi Osiyo chempionatiga O‘zbekiston mezbonlik qiladi.

Joriy yilning oktyabr oyida o‘tkaziladigan mazkur qit’a birinchiligining Saudiya Arabistoni, Avstraliya, Vyetnam va Laos terma jamoalari joylashgan  “S” guruhi o‘yinlari Namangandagi “Navbahor” jamoasi uy uchrashuvlarini o‘tkazadigan “Markaziy” o‘yingohda bo‘lib o‘tadi.  

Bugun viloyatimizdagi stadionlar hamda mehmonxonalarning U – 19 Osiyo chempionatiga muvofiqligini tekshirish maqsadida, O‘zbekiston futbol assosiasiyasi (O‘FA) mutaxassislari – Ahmed Tillayev hamda Islom Ro‘ziyevdan iborat delegasiya a’zolari Namanganga tashrif buyurishdi.

O‘FA vakillari tashrif davomida Namangan shahridagi “Markaziy” o‘yingoh, “Barkamol avlod” sport majmuasi, To‘raqo‘rg‘ondagi “Yoshlik” va Uychidagi “Paxtakor - 79” stadionlari, shuningdek, “Axsikent”, “Oydin Plaza”, “Shedevr Plaza” mehmonlarini ko‘zdan kechirishdi.    

Jumladan, “Markaziy” o‘yingohga tashrif chog‘ida O‘FA mutaxassislari maydonning holati bilan tanishib, shuningdek, jamoalarning kiyim almashtirish, hakamlar va nazoratchilar, doping – nazorat, matbuot anjumani xonalarini  tekshirishdi hamda bu borada ijobiy fikrlar bildirishdi.

Shu tariqa O‘FA delegasiyasining viloyatimizga tashrifi o‘z yakuniga yetdi.

“Navbahor” PFK matbuot xizmati.