Madridning «Real» klubi sobiq bosh murabbiyi Xabi Alonso «Chelsi»ni boshqarishi mumkin. Jurnalist Ekrem Konurning xabar berishicha, «ko‘klar» rahbariyati ehtimoliy hamkorlikni muhokama qilish uchun ispaniyalik mutaxassis bilan allaqachon bog‘langan.
44 yoshli murabbiy o‘z oldiga aniq shart qo‘ydi: u xuddi Leverkuzenning «Bayer» klubidagi faoliyati davrida bo‘lgani kabi, sportga oid masalalarda ko‘proq nazoratga ega bo‘lishni istaydi. Xabi Alonso Liam Rosenyor bilan xayrlashganidan so‘ng «Chelsi» ko‘rib chiqayotgan yagona nomzod emas.
Eslatib o‘tamiz, «Liverpul»ning sobiq yarim himoyachisi yanvar oyidan beri ishsiz yuribdi — u «Real» boshqaruviga kelganidan atigi yarim yil o‘tib, iste’foga chiqarilgan edi.
