2026 yilning yozida “Real”ga qaytishi muhokama qilinayotgan Joze Mourinyo, agar jamoa bosh murabbiyi etib tayinlansa, klubni tark etadigan futbolchilar ro‘yxatini shakllantirib bo‘lgan. Hozirda “Benfika”ni boshqarayotgan portugaliyalik mutaxassis jamoaga “jangovar ruh”ni qaytarish uchun tarkibni tubdan yangilamoqchi.

El Nacional nashri bergan ma’lumotga ko‘ra, “qisqartirish”ga ham faxriylar, ham umidlarni oqlay olmagan futbolchilar tushadi:

David Alaba va Dani Karvaxal: Har ikki himoyachining shartnomasi 2026 yil 30 iyungacha amal qiladi. Klub ularning yoshi, yuqori maoshi va jarohatlarga moyilligi sababli kelishuvni uzaytirmaslikka qaror qilgan.

Eduardu Kamavinga: Fransiyalik futbolchi o‘sishdan to‘xtab qolgani bilan murabbiylar shtabini ranjitgan. Klub uning bozor qiymati yuqoriligida sotib yuborishga tayyor.

Dani Sebalyos va Fran Garsiya: Bu futbolchilar asosiy tarkibdan mustahkam o‘rin egallay olmadi va Mourinyo ularni o‘z loyihasiga kitimaydi.

Brahim Dias: Ayrim yorqin o‘yinlariga qaramay, u barqaror emasligi uchun tanqid qilinmoqda. Avgustda Dias 27 yoshga to‘ladi va u endi istiqbolli aktiv hisoblanmaydi.

Gonsalo Garsiya: Yosh iqtidor yetarli o‘yin amaliyotiga ega bo‘lmadi va katta ehtimol bilan o‘z o‘rnini jamoaga qaytayotgan Endrikka bo‘shatib beradi.

“Real” prezidenti Florentino Peres sovrinsiz o‘tgan ikki mavsumdan so‘ng Alvaro Arbeloaning o‘rniga Mourinyoni asosiy nomzod sifatida ko‘rmoqda. Jozening “Benfika” bilan shartnomasida 3–6 million yevro atrofidagi tovon puli ko‘rsatilgan bo‘lib, u may oyida faollashtirilishi mumkin. Murabbiyning o‘zi hozircha Portugaliya klubi oldidagi majburiyatlarini ro‘kach qilib, aloqalarni rasman rad etmoqda.