Vinger Markus Reshford joriy mavsum yakunlanganidan keyin ham «Barselona»da qolishi mumkin. Kataloniya klubi ingliz futbolchisini mavsum oxirigacha «Manchester Yunayted»dan ijaraga olgan edi. Transfer huquqini to‘liq sotib olish bo‘yicha haligacha kelishuvga erishilmagan bo‘lsa-da, «ko‘k-anorranglilar» 28 yoshli futbolchini yana kamida bir yil o‘z safida saqlab qolmoqchi.

Taniqli jurnalist Xerard Romeroning ma’lumotlariga ko‘ra, «Barsa» o‘yinchining ijara muddatini uzaytirishni rejalashtirmoqda. Hozircha bu variant «qizil iblislar»ni qay darajada qoniqtirishi noma’lum.

Shanba kuni Markus Reshford Xans-Diter Flik jamoasiga «Osasuna»ni mag‘lub etishda (2:1) yordam berdi — u Robert Levandovski tomonidan kiritilgan golga assistentlik qildi.