Вингер Маркус Рэшфорд жорий мавсум якунланганидан кейин ҳам «Барселона»да қолиши мумкин. Каталония клуби инглиз футболчисини мавсум охиригача «Манчестер Юнайтед»дан ижарага олган эди. Трансфер ҳуқуқини тўлиқ сотиб олиш бўйича ҳалигача келишувга эришилмаган бўлса-да, «кўк-анорранглилар» 28 ёшли футболчини яна камида бир йил ўз сафида сақлаб қолмоқчи.
Таниқли журналист Херард Ромеронинг маълумотларига кўра, «Барса» ўйинчининг ижара муддатини узайтиришни режалаштирмоқда. Ҳозирча бу вариант «қизил иблислар»ни қай даражада қониқтириши номаълум.
Шанба куни Маркус Рэшфорд Ханс-Дитер Флик жамоасига «Осасуна»ни мағлуб этишда (2:1) ёрдам берди — у Роберт Левандовски томонидан киритилган голга ассистентлик қилди.
