«Atalanta» bosh murabbiyi Jan Pyero Gasperini Italiya chempionatining 32-turi doirasida «Yuventus»ga qarshi bo‘lib o‘tgan o‘yin (2:2) borasida o‘z fikrini bildirib o‘tdi.

Uchrashuv davomida to‘p bergamoliklar futbolchilari qo‘liga tekkani uchun hakam 2 marta penalti belgiladi va ulardan Krishtianu Ronaldu samarali foydalandi.

«Qoidalar shunday, yaxshi. Ular Italiyada har qanday qoidalardan ustun.

Biz nima qilishimiz kerak edi? Qo‘llarimizni kesib tashlashimiz kerak edimi? Bunday pallada qo‘llarini tanaga yopishtirib olish mumkin. Lekin bu shunday holatda belgilangan ilk penalti emas. Buni mavsum davomida ko‘p jamoalar ishtirokidagi o‘yinlarda ko‘rdik.

Bu ahmoqlik. Bu yerda qoidalarni amalda qo‘llash boshqa joydagidan boshqacharoq. Boshqa mamlakatlarda bunday holatlarda penalti belgilanmaydi.

Biz A seriya peshqadamiga nisbatan ajoyib match o‘tkazdik. Men yigitlarga bu o‘yinga nisbatan xuddi Chempionlar ligasidek yondashishni so‘ragandim. Chunki, avgust oyida bizni shunday saviyadagi jamoalar kutib turibdi.

«Atalanta» ushbu bahsda o‘zi istagan deyarli barcha narsaga erishdi. O‘yinimizdan qoniqish hosil qildim, ammo g‘alaba qozona olmaganimizdan hafsalam pir bo‘ldi. Biz so‘nggi daqiqagacha hisobda oldinda bordik va g‘alaba qozonish uchun qo‘ldan kelgan barcha ishni qildik.

Chempionlar ligasi yo‘llanmasini qo‘lga kiritish bizning asosiy maqsadimiz edi. Shunday ekan, maqsadimiz o‘zgarmaydi», – dedi Gasperini.