Hatto 2018 yilda ham "Paxtakor" bir qator futbolchilarini o‘ziga yaqin jamoalarga ijaraga berishi ko‘p muhokama qilinardi. O‘zPFL reglament orqali buni tartibga soldi. Bugunga kelib, biror klub shu ligadagi boshqa bir klubga ikkitadan ortiq futbolchisini ijaraga bera olmaydi. Holat ancha yaxshilandi.

Yaqindagina ham ijaraga berilgan futbolchi o‘z klubiga qarshi o‘yinlarda maydonga tushmasligi kelishib olinardi. O‘zPFL bunday kelishuvlarni ro‘yxatdan o‘tkazmaydigan bo‘ldi. Bugun "Paxtakor"ga qarshi uchrashuvda birinchi golga assistentlik qilgan, o‘yin davomida "Paxtakor" himoyachilarini shoshirib turgan Hojimat Erkinov asli "Paxtakor" tarbiyalanuvchisi. Huquqiy jihatdan hamon "Paxtakor"ga tegishli bo‘lgan yosh iqtidor egasi, AGMK klubida ijara asosida harakat qiladi. Ya’ni, bu jarayon ham tartibga keldi.

Biz ishlashda davom etamiz. Yaxshi takliflarni esa albatta o‘rganib chiqamiz. Afsuski, pandemiya bir qator rejalarimizga xalal berdi. To‘liq baxt uchun Qirg‘iziston va Tojikiston klublari ham to‘p suradigan Liga kubogi va xuddi Superliga kabi o‘tishi belgilab qo‘yilgan U-18 birinchiligi yetishmayapti. Virus bizni tark etsa, 2021 yil bugungisidan yaxshiroq bo‘ladi deb ishonamiz.

Diyor Imomxo‘jayev