Ҳатто 2018 йилда ҳам "Пахтакор" бир қатор футболчиларини ўзига яқин жамоаларга ижарага бериши кўп муҳокама қилинарди. ЎзПФЛ регламент орқали буни тартибга солди. Бугунга келиб, бирор клуб шу лигадаги бошқа бир клубга иккитадан ортиқ футболчисини ижарага бера олмайди. Ҳолат анча яхшиланди.
Яқиндагина ҳам ижарага берилган футболчи ўз клубига қарши ўйинларда майдонга тушмаслиги келишиб олинарди. ЎзПФЛ бундай келишувларни рўйхатдан ўтказмайдиган бўлди. Бугун "Пахтакор"га қарши учрашувда биринчи голга ассистентлик қилган, ўйин давомида "Пахтакор" ҳимоячиларини шошириб турган Ҳожимат Эркинов асли "Пахтакор" тарбияланувчиси. Ҳуқуқий жиҳатдан ҳамон "Пахтакор"га тегишли бўлган ёш иқтидор эгаси, АГМК клубида ижара асосида ҳаракат қилади. Яъни, бу жараён ҳам тартибга келди.
Биз ишлашда давом этамиз. Яхши таклифларни эса албатта ўрганиб чиқамиз. Афсуски, пандемия бир қатор режаларимизга халал берди. Тўлиқ бахт учун Қирғизистон ва Тожикистон клублари ҳам тўп сурадиган Лига кубоги ва худди Суперлига каби ўтиши белгилаб қўйилган U-18 биринчилиги етишмаяпти. Вирус бизни тарк этса, 2021 йил бугунгисидан яхшироқ бўлади деб ишонамиз.
Диёр Имомхўжаев