"Paxtakor"ga qarshi o‘yindan keyin AGMK bosh murabbiyi Mirjalol Qosimov uchrashuv haqidagi fikrlari bilan o‘rtoqlashdi.

"Turnir jadvalining yuqori pog‘onalarini egallab turgan ikki jamoa to‘qnashdi. Qolaversa, "Paxtakor" 2-3 yildan buyon o‘zagini saqlagan holda yaxshi shakllananib ulgurgan jamoa. "Paxtakor"da kuchli ijrochilar bor. Menimcha, jamoam yomon o‘yin ko‘rsatmadi. Faqat uchrashuvning oxirgi 20 daqiqasida bo‘shashganimiz pand berdi. Qisqa vaqt ichida darvozamizdan ikkita to‘p olib chiqdik. Yutib ketishimiz ham mumkin edi. Futbol shunisi bilan qiziq. Qo‘shib berilgan daqiqalarda gol o‘tkazib, mag‘lubiyatga uchrashimiz ham mumkin edi. Bugun Suhrob Sultonov yaxshi harakat qildi. Chiroyli o‘yin bo‘ldi. Ayrim jarohat olgan futbolchilarimiz bugun yordam bera olishmadi va ularni o‘rniga tushgan o‘yinchilar bir-birlarini o‘rnini munosib to‘ldirdi. Agarda so‘nggi 15 daqiqadagi bo‘shashib qolganimizni inobatga olmasa, durang adolatli natija bo‘ldi.

Zamoniy futbolni piyoda o‘ynab bo‘lmaydi. Bugungi kunda futbolda ko‘p yugurgan jamoa muvaffaqiyat qozonishi mumkin. Texnika, fikrlash va boshqa narsalar ikkinchi, uchinchi darajaga tushgan. Har o‘yinda rotasiya amalga oshiryapmiz. Chunki qo‘l ostimda 20 nafar futbolchi va 3 darvozabon mavjud. Elguja Grigalashvili, Sanjar Tursunov va Dilshod Jo‘rayev jarohat sabab yordam bera olishmadi. Saydullo Rahmatovga chap qanot himoyasida raqobat tug‘dirish maqsadida Murod Toshmatovni ham qanot himoyada o‘ynatyapman. Tarkibda barcha futbolchilar har o‘yinimizda o‘z hissalarini qo‘shishmoqda.

Hojimat Erkinov bizga "Paxtakor"dan ijara asosida o‘tgan. Bugun o‘z jamoasiga qarshi yuqori ishtiyoq bilan to‘p tepdi. Yosh bo‘lishiga qaramasdan iqtidorli va mahoratli futbolchi. Elgujani o‘rniga boshlang‘ich tarkibdan joy oldi. Joriy mavsum Erkinov o‘zidan yomon taassurot qoldirmayapti. Jizzaxda "So‘g‘diyona" bilan  hamda Olmaliqda "Bunyodkor"ga qarshi uchrashuvda ham zaxiradan maydonga tushib o‘yinni kuchaytirgandi. Mehnat qilishda davom etishi kerak. O‘sishdan to‘xtab qolishi kerak emas. Hojimat Erkinovning kelajagi porloq", — dedi Mirjalol Qosimov.