Mazkur oyda AQSHning Kaliforniya shtati Inglvud shahrida dunyo tarixidagi eng qimmatbaho stadion – «SoFi Stadium» foydalanishga topshiriladi. Stadionni barpo etish uchun 5 mlrd. AQSH dollari sarflandi. Solishtiradigan bo‘lsak, bu Londondagi mashhur “Uembli”ga qaraganda uch barobar, Sankt-Peterburgdagi “Krestovskiy”ga nisbatan esa to‘rt baravar ko‘p demakdir.
«SoFi Stadium» Amerika professional sokker futbol ligasining (NFL) ikki jamoasi – «Los-Anjeles Rems» va «Los-Anjeles Charjers» uchun uy stadioni bo‘ladi. Bundan tashqari u olamshummul sport tadbirlari, shu jumladan “Superboul-2022” va 2028 yilgi yozgi Olimpiya o‘yinlari ochilish marosimiga mezbonlik qilishi kutilmoqda. Kelgusi yil ana shu stadionda 2026 yilgi jahon chempionati o‘tkazilishi masalasi ham hal etilishi kutilmoqda.
AQSHning Nevada shtatidagi Paradays shahrida qurilishi tugallanayotgan «Allegiant Stadium» – qimmatbaholigi bo‘yicha jahondagi ikkinchi stadionga aylanadi. To‘g‘ri, unga “bor-yo‘g‘i” 2 mlrd.dollar mablag‘ sarflanmoqda. U ham Amerika professional futbol ligasi (NFL) klubi uchun barpo etilmoqda.
Yangi «Las-Vegas Reyders» arenasi musobaqalarga 27 avgustda mezbonlik qilishi kutilmoqda. Hozir esa ob’ektni foydalanishga topshirish uchun so‘nggi qurilish ishlari nihoyasiga yetmoqda. Stadion 65 ming tomoshabinga mo‘ljallangan va Las-Vegasning shahar muhitiga juda monand ko‘rinishga ega.
