Мазкур ойда АҚШнинг Калифорния штати Инглвуд шаҳрида дунё тарихидаги энг қимматбаҳо стадион – «SoFi Stadium» фойдаланишга топширилади. Стадионни барпо этиш учун 5 млрд. АҚШ доллари сарфланди. Солиштирадиган бўлсак, бу Лондондаги машҳур “Уэмбли”га қараганда уч баробар, Санкт-Петербургдаги “Крестовский”га нисбатан эса тўрт баравар кўп демакдир.
«SoFi Stadium» Америка профессионал соккер футбол лигасининг (NFL) икки жамоаси – «Лос-Анжелес Рэмс» ва «Лос-Анжелес Чаржерс» учун уй стадиони бўлади. Бундан ташқари у оламшуммул спорт тадбирлари, шу жумладан “Супербоул-2022” ва 2028 йилги ёзги Олимпия ўйинлари очилиш маросимига мезбонлик қилиши кутилмоқда. Келгуси йил ана шу стадионда 2026 йилги жаҳон чемпионати ўтказилиши масаласи ҳам ҳал этилиши кутилмоқда.
АҚШнинг Невада штатидаги Парадайс шаҳрида қурилиши тугалланаётган «Allegiant Stadium» – қимматбаҳолиги бўйича жаҳондаги иккинчи стадионга айланади. Тўғри, унга “бор-йўғи” 2 млрд.доллар маблағ сарфланмоқда. У ҳам Америка профессионал футбол лигаси (NFL) клуби учун барпо этилмоқда.
Янги «Лас-Вегас Рэйдерс» аренаси мусобақаларга 27 августда мезбонлик қилиши кутилмоқда. Ҳозир эса объектни фойдаланишга топшириш учун сўнгги қурилиш ишлари ниҳоясига етмоқда. Стадион 65 минг томошабинга мўлжалланган ва Лас-Вегаснинг шаҳар муҳитига жуда монанд кўринишга эга.
