Ispaniya La Ligasining 2019/2020 yilgi mavsumi yakunlanishiga bir tur qolganida, «Barselona» chempionatda g‘alaba qozonish imkoniyatidan mahrum bo‘ldi va chempionlikni «Real»ga topshirib qo‘ydi.
Shu tariqa katalon klubi 2014 yildan beri ilk marta na La Ligada va na Ispaniya kubogida g‘alaba qozona olmadi. Kubok bahslarida Kike Setyen shogirdlari chorak final bosqichida «Atletik»dan mag‘lubiyatga uchragan.
Mavsum oxirida katalon klubi uchun yutish mumkin bo‘lgan bitta sovrin qolmoqda. U ham bo‘lsa, Chempionlar Ligasi. Musobaqa koronavirus pandemiyasi sabab 1/8 final bosqichida to‘xtab qolgan. «Barselona» ushbu bosqichda «Napoli» bilan to‘qnash kelgan. Tomonlarning Italiyada o‘tgan dastlabki o‘yinida 1:1 hisobida durang qayd etilgan. Javob uchrashuvi esa 8 avgust kuni bo‘lib o‘tadi.
37-turda «Real» «Vilyarreal»ni 2:1 hisobida mag‘lub etib, chempionlikni qo‘lga kiritgan bo‘lsa, «ko‘k-anorranglilar» «Osasuna»ga 1:2 hisobida mag‘lub bo‘ldi. Oradagi farq 7 ochkoni tashkil qiladi. Musobaqa yakuniga yetishiga 1 tur qolgan.
