“Formula-1” qirollik poygalarining sobiq rahbari Berni Ekklstoun Xalqaro Olimpiya qo‘mitasiga tashrifi paytida Muhammad Ali tomonidan 1996 yilda Atlantadagi Olimpiya stadionida o‘t oldirilgan afsonaviy mash’alani XOQga sovg‘a qildi.

“Shaxsan men uchun ushbu noyob mash’alani qidirib topish katta faxr bo‘ldi va uni saqlash uchun XOQ muzeyidanda yaxshi joy yo‘q”, – dedi Berni Ekklstoun.

“Bu mash’ala Olimpiya o‘yinlarining ramzidir”, – dedi XOQ prezidenti Tomas Bax noyob sovg‘ani qabul qilib olar ekan.

Ushbu sovg‘a XOQning 136-sessiyasi bo‘lib o‘tganidan bir necha kun keyin topshirildi. XOQ prezidenti Tomas Bax sovg‘ani qabul qilib olar ekan, Muhammad Alining dafn etilishida hilpiragan ikki bayroqning bittasi Olimpiya bayrog‘i bo‘lganligini yodga olib, uning birdamlik g‘oyasidan iqtibos keltirdi: “Biz Yer yuzida bo‘lgan hamma vaqtimizni rahmdillik yoki uyalgandan emas, balki barcha odamlarga muhabbatimiz tufayli boshqalarga yordam berishga va ular uchun adolat va tenglik yaratishga sarflashimiz kerak”.